SI PAULO, at si Silvanus, at si Timoteus, sa
simbahan ng mga taga-Tesalonika sa Diyos na Ama natin at sa Panginoong Jesus
Kristo:
2
Ang biyaya nawa ay sumainyo, at ang kapayapaan, mula sa Diyos na Ama natin at
sa Panginoong Jesus Kristo.
3 Natatalian kami na magpasalamat sa
Diyos palagi dahil sa inyo, mga kapatid, gaya ng nararapat, dahil sa ang
pananampalataya ninyo ay lumalago nang labis, at ang pagsinta ng bawa’t isa sa
inyong lahat tungo sa isa’t isa ay sumasagana;
4 Anupa’t kami mismo ay nagmamapuri sa
inyo sa mga simbahan ng Diyos dahil sa inyong pagtitiyaga at pananampalataya sa
lahat ng inyong pag-uusig at kagipitang tinitiis ninyo:
5 Na ito ay isang lantad na palatandaan
ng matuwid na paghuhukom ng Diyos, upang maibilang kayong karapat-dapat sa
kaharian ng Diyos, na dahil dito kayo rin naman ay nagdurusa:
6 Na nakikitang isa itong matuwid na
bagay sa Diyos na gantihan ng kagipitan silang nagpapahirap sa inyo;
7 At sa inyong mga pinapahirapan ay
magpahingang kasama namin, kapag ang Panginoong Jesus ay mabubunyag na galing
sa langit kasama ng mga makapangyarihan niyang anghel,
8 Sa naglalagablab na apoy ay maghihiganti
sa kanila na hindi nakakakilala sa Diyos, at hindi tumatalima sa
mabuting-balita ng ating Panginoong Jesus Kristo:
9 Na sila ay paparusahan ng
pagkapuksang panghabang-panahon mula sa harapan ng Panginoon, at mula sa
kaluwalhatian ng kapangyarihan niya;
10 Kapag darating siya upang
maluwalhati sa mga banal niya, at upang mahangaan sa kanilang lahat na nananalig
(dahil ang patotoo namin sa gitna ninyo ay pinanaligan) sa araw na iyon.
11 Kaya nga kami rin naman ay
dumadalangin palagi patungkol sa inyo, na ibilang kayo ng Diyos natin na
karapat-dapat sa pagkakatawag na ito, at ganapin ang buong mabuting kaluguran
ng kabutihan niya, at ang gawa ng pananampalataya na may kapangyarihan:
12 Upang ang pangalan ng ating
Panginoong Jesus Kristo ay maluwalhati sa inyo, at kayo ay sa kanya, ayon sa
biyaya ng Diyos natin at Panginoong Jesus Kristo.
NGAYON ay namamanhik kami sa inyo, mga
kapatid, sa pamamagitan ng pagdating ng ating Panginoong Jesus Kristo, at sa
pamamagitan ng sama-sama nating pagtitipon sa kanya,
2 Na huwag kayong madaling mayanig sa
pag-iisip, o mabagabag, ni sa pamamagitan ng espiritu, ni ng salita, ni ng
sulat na waring nanggaling sa amin, na gaya ng ang araw ni Kristo ay malapit
na.
3 Huwag hayaan ang sinumang taong manlinlang
sa inyo sa anumang paraan: pagkat ang araw na iyon ay hindi darating, malibang
may dumating munang isang pagtalikod, at ang tao ng kasalanan ay mabunyag, ang
anak ng pagkawasak;
4 Na sumasalungat at nagtataas ng
kanyang sarili sa ibabaw ng lahat ng tinatawag na Diyos, o ng sinasamba;
anupa’t siya na gaya ng Diyos ay nauupo sa templo ng Diyos, na ipinapakita ang
sarili niya na siya ay Diyos.
5 Hindi ba ninyo naaalala, na, noong
kasama pa ninyo ako, ay sinabi ko sa inyo ang mga bagay na ito?
6 At ngayon ay nalalaman ninyo kung ano
ang pumipigil upang mabunyag siya sa kanyang panahon.
7 Pagkat ang hiwaga ng
kawalang-katarungan ay gumagawa na noon pa: siya lamang na ngayon ay
humahadlang ay hahadlang, hanggang sa alisin siya sa daan.
8 At kung magkagayon ang Balakyot na
iyon ay mabubunyag, na siyang tutupukin ng Panginoon sa pamamagitan ng espiritu
ng bibig niya, at pupuksain sa pamamagitan ng ningning ng pagdating niya:
9 Maging siya, na ang pagdating ay alinsunod
sa paggawa ng Satanas na may buong kapangyarihan at mga tanda at
nagsisinungaling na mga kababalaghan,
10 At nang may buong pagkamalinlangin
ng kalikuan sa kanilang nawawasak; dahil hindi nila tinanggap ang pagmamahal sa
katotohanan, upang maligtas sila.
11 At sa dahilang ito ang Diyos ay
magpapadala sa kanila ng malakas na pagkakalinlang, upang manalig sila sa isang
kasinungalingan:
12 Upang masumpa silang lahat na hindi nanalig
sa katotohanan, kundi nagkaroon ng kaluguran sa kalikuan.
13 Ngunit natatalian kami na magbigay
pasalamat nang tuluy-tuloy sa Diyos dahil sa inyo, mga kapatid na minamahal ng
Panginoon, dahil ang Diyos mula pa sa pasimula ay pumili na sa inyo sa
ikaliligtas sa pamamagitan ng pagpapabanal ng Espiritu at pananalig sa katotohanan:
14 Na doon ay tinawag niya kayo sa
pamamagitan ng mabuting-balita namin, patungo sa pagkakamit ng kaluwalhatian ng
ating Panginoong Jesus Kristo.
15 Kung gayon, mga kapatid, tumayong matatag,
at panghawakan ang mga kinaugaliang itinuro sa inyo, maging sa pamamagitan ng
salita, o ng sulat namin.
16 Ngayon ang ating Panginoong Jesus
Kristo mismo, at ang Diyos, samakatuwid ay ang Ama natin, na nagmahal sa atin,
at nagbigay sa atin ng panghabang-panahong kagiliwan at mabuting pag-asa sa
pamamagitan ng biyaya,
17 Ay umaliw nawa sa inyong mga puso,
at magpatatag sa inyo sa bawa’t mabuting salita at gawa.
SA WAKAS, mga kapatid, manalangin patungkol
sa amin, upang ang salita ng Panginoon ay magkaroon ng malayang daan, at
maluwalhati, maging gaya ng ito ay sa inyo:
2 At nang masagip kami mula sa mga
walang-katuwiran at mga balakyot na tao: pagkat lahat ng tao ay walang
pananampalataya.
3 Ngunit ang Panginoon ay matapat, na
siyang magpapatatag sa inyo, at mag-iingat sa
inyo mula sa kasamaan.
4 At kami ay may pagkakatiwala sa
Panginoon patungkol sa inyo, na kapuwa ninyo ginagawa at gagawin ang mga bagay
na iniuutos namin sa inyo.
5 At patnubayan nawa ng Panginoon ang
mga puso ninyo patungo sa pag-ibig ng Diyos, at patungo sa matiyagang
paghihintay kay Kristo.
6 Ngayon ay inuutusan namin kayo, mga
kapatid, sa pangalan ng ating Panginoong Jesus Kristo, na ilayo ang inyong
sarili mula sa bawa’t kapatid na lumalakad nang di-maayos, at hindi alinsunod
sa kinaugaliang tinanggap niya mula sa amin.
7 Pagkat nalalaman ninyo mismo kung
paano ninyo nararapat na sundan kami: pagkat hindi namin iniasal ang aming
sarili nang di-maayos sa gitna ninyo;
8 Ni kumain man kami ng tinapay ng
sinumang tao nang hindi binayaran; kundi gumawa na may pagpapagal at
pagdaramdam gabi at araw, nang hindi kami maging pasanin sa sinuman sa inyo:
9 Hindi dahil sa wala kaming
kapangyarihan, kundi upang gawin ang sarili namin na isang uliran sa inyo upang
sundan kami.
10 Pagkat maging noong kami ay kasama
ninyo, ay iniutos namin ito sa inyo, na kung hindi nais gumawa ng sinuman, ay
hindi siya makakakain.
11 Pagkat naririnig namin na may ilang
lumalakad sa gitna ninyo nang di-maayos, na hindi na nga gumagawa, kundi mga
mapakialam.
12 Ngayon silang mga ganoon ay
inuutusan namin at tinatagubilinan sa pamamagitan ng ating Panginoong Jesus
Kristo, na gumawa silang may katahimikan, at kumain ng sarili nilang
tinapay.
13 Ngunit kayo, mga kapatid, ay huwag
mapagod sa paggawa nang mabuti.
14 At kung hindi tumalima ang sinumang
tao sa salita namin sa pamamagitan ng sulat na ito, ay tandaan ang taong iyon,
at huwag magkaroon ng pakikipagsamahan sa kanya, nang mapahiya siya.
15 Gayunman ay huwag siyang ibilang
gaya ng isang kaaway, kundi paalalahanan siyang gaya ng isang kapatid.
16 Ngayon ang Panginoon ng kapayapaan
mismo ay magbigay nawa sa inyo ng kapayapaan palagi sa lahat ng paraan. Ang
Panginoon nawa ay makasama ninyong lahat.
17 Ang pagpupugay ni Paulo sa sarili kong
kamay, na ito ay palatandaan sa bawa’t sulat: gayon ako sumusulat.
18 Ang biyaya ng ating Panginoong Jesus
Kristo nawa ay makasama ninyong lahat. Amen.
Ang
ikalawang sulat sa mga taga-Tesalonika
ay isinulat ni Paulo mula sa Korinto noong A.D. 53
No comments:
Post a Comment