AKO kung gayon, na bilanggo ng Panginoon, ay
namamanhik sa inyo na lumakad kayo nang
karapat-dapat sa bokasyong sa inyo ay itinatawag,
2 Na may buong kababaan at kaamuan, na may
pagbabata, na nagtitiisan sa isa’t isa sa pagmamahal;
3 Na nagsusumikap na ingatan
ang pagkakaisa ng Espiritu sa tali ng kapayapaan.
4 May iisang katawan, at
iisang Espiritu, maging gaya rin naman ng tinatawag kayo sa iisang pag-asa ng
pagkakatawag ninyo;
5 Iisang Panginoon, iisang
pananampalataya, iisang binyag,
6 Iisang Diyos at Ama ng lahat, na nasa ibabaw ng
lahat, at sa pamamagitan ng lahat, at nasa inyong lahat.
7 Ngunit sa bawa’t isa sa atin ay ibinibigay ang
biyaya ayon sa sukat ng kaloob ni Kristo.
8 Kaya nga sinasabi niya, Nang umakyat siya sa
itaas, ay inakay niyang bihag ang pagkabihag, at nagbigay ng mga kaloob sa mga
tao.
9 (Ngayong siya ay umakyat, ano ba ito kundi ang bumaba
rin muna siya sa mas malalalim na bahagi ng lupa?
10 Siya na bumaba ay siya rin namang umakyat
paitaas sa kaiba-ibabawan ng lahat ng langit, upang mapuno niya ang lahat ng
bagay.)
11 At nagbigay siya sa ilan, ng mga apostol; at
sa ilan, ng mga propeta; at sa ilan, ng mga ebanghelista; at sa ilan, ng mga
pastor at mga guro;
12 Ukol sa ikasasakdal ng mga banal, ukol sa gawa
ng ministeryo, ukol sa ikatitibay ng katawan ni Kristo:
13 Hanggang sa dumating tayong lahat na nasa
pagkakaisa ng pananampalataya, at ng kaalaman ng Anak ng Diyos, patungo sa
pagiging isang sakdal na lalaki, hanggang sa sukat ng pangangatawan ng kalubusan
ni Kristo:
14 Upang tayo mula ngayon ay huwag nang maging
mga bata pa, na naihahagis paroo’t parito, at dinadala sa magkabi-kabila ng
bawa’t hangin ng turo, sa pamamagitan ng mga daya ng mga tao, at mapanlinlang
na katusuhan, na sa pamamagitan ng mga ito ay nagsasabuwatan sila upang
manlinlang;
15 Kundi sa pagsasalita ng katotohanan sa
pagmamahal, ay lumaki sa kanya sa lahat ng bagay, na siyang ulo, samakatuwid ay
si Kristo:
16 Na mula sa kanya ang buong katawan na
sama-samang idinugtong at pinag-isang mabuti sa pamamagitan ng tulong ng bawa’t
kasukasuan, ayon sa mabisang paggawa sa sukat ng bawa’t bahagi, ay gumagawa ng
paglago ng katawan sa ikatitibay ng sarili nito sa pagmamahal.
17 Ito ang sinasabi ko kung gayon, at
pinatotohanan sa Panginoon, na kayo mula ngayon ay huwag nang lumakad pang gaya
naman ng lakad ng ibang mga Hentil, sa kawalang-kabuluhan ng pag-iisip nila,
18 Na ang pagkaunawa ay nagdidilim, na napapalayo
mula sa buhay ng Diyos sa pamamagitan ng kamangmangang nasa kanila, dahil sa
pagkabulag ng puso nila:
19 Na sila sa di pagkaramdam ay ibinigay na ang
kanilang sarili patungo sa kalibugan, para isagawa ang buong karumihan nang may
katakawan.
20 Ngunit
hindi kayo natuto ng gayon kay Kristo;
21 Kung tunay ngang narinig na ninyo siya, at
tinuruan na niya, kung paanong ang katotohanan ay na kay Jesus:
22 Na hubarin ninyo tungkol sa dating pamumuhay
ang lumang tao, na ito ay bulok ayon sa mga mapanlinlang na pita;
23 At magpanibago sa espiritu ng pag-iisip ninyo;
24 At isuot ninyo ang bagong tao, na ito alinsunod
sa Diyos ay nilalang sa katuwiran at tunay na kabanalan.
25 Kaya nga pagkaalis ng pagsisinungaling, ay
magsalita ang bawa’t tao ng katotohanan kasama ng kapuwa niya: pagkat tayo ay
mga sangkap ng isa’t isa.
26 Magalit kayo, at huwag magkasala: huwag
hayaang lubugan ng araw ang pagkapoot ninyo:
27 Ni magbigay ng daan sa
diyablo.
28 Hayaan siya na nagnakaw
ay huwag nang magnakaw pa: kundi bagkus ay hayaan siyang magpagal, na gumagawa
sa mga kamay niya ng bagay na mabuti, upang magkaroon siya ng maiibigay sa
kanya na nangangailangan.
29 Huwag ninyong hayaan ang
bulok na pakikipagtalastasan na lumabas buhat sa bibig ninyo, kundi iyong
mabuti para magamit sa ikatitibay, upang makapagministeryo ito ng biyaya sa mga
tagapakinig.
30 At huwag pighatiin ang
banal na Espiritu ng Diyos, na sa pamamagitan niya ay tinatakan kayo hanggang
sa araw ng katubusan.
31 Hayaang ang buong kapaitan, at pagkapoot, at
pagkagalit, at maingay na hiyawan, at masamang pagsasalita, ay maalis mula sa
inyo, kasama ang buong malisya:
32 At maging mabait kayo sa isa’t isa, na may
malambot-na-puso, na nagpapatawaran sa isa’t isa, gaya naman ng Diyos na
alang-alang kay Kristo ay nagpatawad sa inyo.
KAYO kung gayon ay maging mga tagasunod ng Diyos,
gaya ng mga minamahal na anak;
2 At lumakad sa pagmamahal, gaya rin naman ni
Kristo na nagmahal na sa atin, at ibinigay na ang kanyang sarili dahil sa atin
na isang handog at isang hain sa Diyos bilang isang mabangong samyo.
3 Ngunit ang pakikiapid, at ang buong karumihan,
o kasakiman, ay huwag itong hayaang kahit minsan ay masambit sa gitna ninyo,
gaya ng nababagay sa mga banal;
4 Ni ang karumihan man, ni ang hangal na pangungusap,
ni ang mahalay-na-pagbibiro, na ang mga ito ay hindi naaangkop: kundi bagkus ay
ang pagbibigay ng pasalamat.
5 Pagkat nalalaman ninyo ito, na
walang bugaw, ni maruming tao, ni masakim na tao, na isang
mapagsamba sa diyusdiyosan, ang may anumang pamana sa kaharian ni Kristo at ng
Diyos.
6 Huwag hayaang malinlang kayo ng sinumang tao ng
mga salitang walang-kabuluhan: pagkat dahil sa mga bagay na ito ay dumarating
ang pagkapoot ng Diyos sa ibabaw ng mga anak ng di-pagtalima.
7
Huwag kayo kung gayon na
maging mga kabahagi sa kanila.
8 Pagkat minsan kayong naging dilim, ngunit ngayon ay liwanag na kayo sa
Panginoon: lumakad gaya ng mga anak ng
liwanag:
9 (Pagkat ang bunga ng Espiritu ay nasa
buong kabutihan at katuwiran at katotohanan;)
10
Na
sinusubok kung ano ang katanggap-tanggap patungo sa Panginoon.
11 At huwag magkaroon ng pakikisama sa
mga walang-bungang gawa ng dilim, kundi bagkus ay sawatain sila.
12 Pagkat isa itong kahihiyan na
salitain man lamang ang mga bagay na iyon na ginagawa nila sa lihim.
13 Ngunit ang lahat ng bagay na
sinasawata ay inilalantad ng liwanag: pagkat ang anumang naglalantad ay
liwanag.
14 Kaya nga sinasabi niya, Gumising
kang natutulog, at bumangon ka mula sa mga patay, at bibigyan ka ni Kristo ng
liwanag.
15
Tiyakin ngang lumalakad kayo nang maingat, huwag gaya ng mga hangal, kundi gaya ng marurunong,
16 Na sinasamantala ang panahon, dahil
ang mga araw ay masasama.
17 Kaya nga huwag kayong maging
di-marurunong, kundi inuunawa kung ano ang kalooban ng Panginoon.
18 At huwag maglasing ng alak, na kung
saan ay may pagmamalabis; kundi mapuno
ng Espiritu;
19 Na nagsasalita sa inyong sarili sa
mga salmo at mga himno at mga awit na espirituwal, na umaawit at gumagawa ng
himig sa puso ninyo patungo sa Panginoon;
20 Na nagbibigay pasalamat palagi patungkol
sa lahat ng bagay sa Diyos at Ama sa pangalan ng ating Panginoong Jesus Kristo;
21
Na
ipinapasakop ninyo ang inyong sarili sa isa't isa sa pagkatakot sa Diyos.
22
Mga asawa,
ipasakop ninyo ang inyong sarili sa mga sarili ninyong bana, na gaya ng sa
Panginoon.
23 Pagkat ang bana ang ulo ng asawa,
maging gaya rin naman ni Kristo na ulo ng simbahan: at siya ang tagapagligtas
ng katawan.
24
Kung gayon kung
paanong ang simbahan ay nagpapailalim kay Kristo, ay maging gayon din naman ang
mga asawa sa kanilang mga sariling bana sa bawa’t bagay.
25 Mga bana,
mahalin ninyo ang mga asawa ninyo, maging gaya rin naman ni Kristo na nagmahal
sa simbahan, at ibinigay ang kanyang sarili para dito;
26 Upang mapabanal at malinis niya ito
nang may paghuhugas ng tubig sa pamamagitan ng salita,
27 Upang maiharap niya ito sa
kanyang sarili na isang maluwalhating simbahan, na walang batik, o kulubot, o
anumang ganoong bagay; kundi upang ito ay maging banal at walang dungis.
28 Kaya nararapat mahalin ng mga
lalaki ang mga asawa nila na gaya ng sarili nilang mga katawan. Siya na
nagmamahal sa asawa niya ay nagmamahal sa sarili niya.
29 Pagkat
walang taong namuhi kailanman sa sarili niyang laman; kundi inaalagaan at
kinakandili ito, maging gaya rin naman ng Panginoon sa simbahan:
30 Pagkat tayo
ay mga sangkap ng katawan niya, ng laman niya, at ng mga buto niya.
31 Sa dahilang
ito ay iiwan ng isang lalaki ang ama at ina niya, at makikisanib sa asawa niya,
at silang dalawa ay magiging iisang laman.
32 Ito ay isang dakilang
hiwaga: ngunit nagsasalita ako tungkol kay Kristo at sa
simbahan.
33 Gayon pa man hayaang mahalin ng
bawa't isa sa inyo na isa-isa ang asawa niya nang gayon maging gaya ng sarili
niya; at tiyakin ng asawa na pinipitagan niya ang bana niya.
MGA anak, tumalima
sa mga magulang ninyo sa Panginoon: pagkat ito ay tama.
2 Parangalan mo ang iyong ama at ina;
(na ito ay ang unang kautusan na may pangako;)
3 Upang makabuti ito sa iyo, at
mabuhay ka nang mahaba sa ibabaw ng lupa.
4 At, kayong mga ama, huwag udyukan
sa pagkapoot ang mga anak ninyo: kundi palakihin sila sa pag-aalaga at
pagpapaalala ng Panginoon.
5 Mga lingkod, maging matalimahin sa
kanilang mga amo ninyo ayon sa laman, na may pagkatakot at panginginig, sa
katapatan ng puso ninyo, na gaya ng kay Kristo;
6 Hindi ng paglilingkod sa paningin,
na gaya ng mga nagbibigay-lugod sa mga tao; kundi gaya ng mga lingkod ni
Kristo, na ginagawa ang kalooban ng Diyos mula sa puso;
7 Na gumagawa ng paglilingkod nang
may mabuting kalooban, gaya ng sa Panginoon, at hindi sa mga tao:
8 Na nalalamang anumang mabuting
bagay na ginagawa ng sinumang tao, ay iyon din ang tatanggapin niya mula sa
Panginoon, maging siya man ay alipin o malaya.
9 At, kayong mga amo, gawin ang mga gayon
ding bagay sa kanila, na pinipigil ang mga pagbabanta: na nalalamang ang Amo
din naman ninyo ay nasa langit; na sa kanya ay walang pagtatangi ng mga tao.
10 Sa wakas, mga kapatid ko,
magpakalakas sa Panginoon, at sa kapangyarihan ng kalakasan niya.
11 Isuot ang buong baluti ng Diyos,
upang makaya ninyong tumayo laban sa mga lalang ng diyablo.
12 Pagkat nakikipagbuno tayo hindi
laban sa laman at dugo, kundi laban sa mga pamunuan, laban sa mga
kapangyarihan, laban sa mga pinuno ng dilim ng sanlibutang ito, laban sa mga
espirituwal na kabalakyutan sa matataas na dako.
13 Kaya nga kunin ninyo ang kabuuang
baluti ng Diyos, upang makaya ninyong makatagal sa araw na masama, at
pagkatapos na magawa ang lahat, ay tumayo.
14 Tumayo kung gayon, na ang mga
baywang ninyo ay nabibigkisan ng katotohanan, at nasusuotan ng
baluting-pandibdib ng katuwiran;
15 At ang mga paa ninyo ay may
panyapak na paghahanda ng mabuting-balita ng kapayapaan;
16 Higit sa lahat, ay kinukuha ang
kalasag ng pananampalataya, na sa pamamagitan nito ay makakaya ninyong apulain
ang lahat ng nagniningas na panudla ng balakyot.
17 At kunin ang helmet ng
kaligtasan, at ang tabak ng Espiritu, na ito ay ang salita ng Diyos:
18 Na nananalanging palagi nang may
buong panalangin at kahilingan sa Espiritu, at nagbabantay doon nang may buong
katiyagaan at kahilingan patungkol sa lahat ng banal;
19 At patungkol sa akin, upang
maibigay sa akin ang pagbigkas, nang mabuksan ko ang bibig ko nang matapang, para
maipaalam ang hiwaga ng mabuting-balita,
20 Na dahil dito ay isa akong embahador
na nakatanikala; upang sa ganito ay makapagsalita ako nang matapang, gaya ng
nararapat kong salitain.
21 Ngunit upang malaman din naman
ninyo ang mga bagay na tungkol sa akin, at kung paano ako gumagawa, si Tikikus
na isang minamahal na kapatid at matapat na ministro sa Panginoon, ang
magpapaalam sa inyo ng lahat ng bagay:
22 Na sinugo ko sa inyo dahil sa
gayon ding layunin, upang malaman ninyo ang mga bagay na tungkol sa amin, at nang
maaliw niya ang mga puso ninyo.
23 Kapayapaan nawa sa mga kapatid,
at pagmamahal na may pananampalataya, mula sa Diyos Ama at sa Panginoong Jesus
Kristo.
24 Ang biyaya nawa ay makasama nilang
lahat na nagmamahal sa ating Panginoong Jesus Kristo sa katapatan. Amen.
No comments:
Post a Comment