KUNG binuhay nga kayong kasama ni Kristo, hanapin
ang mga bagay na iyon na nasa itaas, kung saan ay nakaupo si Kristo sa kanang
kamay ng Diyos.
2 Ituon ang pag-ibig ninyo sa mga bagay na nasa
itaas, hindi sa mga bagay na nasa ibabaw ng lupa.
3 Pagkat patay na kayo, at ang buhay ninyo ay
natatagong kasama ni Kristo sa Diyos.
4 Kapag si Kristo, na buhay natin, ay magpakita, ay
magpapakita nga rin naman kayong kasama niya sa kaluwalhatian.
5 Patayin kung gayon ang mga sangkap ninyong nasa
ibabaw ng lupa: pakikiapid, karumihan, walang-pagpipigil na pag-ibig, masamang
pagnanasa, at kasakiman, na pagsamba sa diyus-diyosan:
6 Pagkat alang-alang sa mga bagay na iyon ay dumarating
ang pagkapoot ng Diyos sa mga anak ng di-pagtalima:
7 Na sa mga iyon kayo rin naman ay lumakad nang
ilang panahon, nang namuhay kayo sa kanila.
8 Ngunit ngayon ay hubarin din naman ninyo ang
lahat ng ito; pagkagalit, pagkapoot, malisya, kalapastanganan, maruruming pakikipagtalastasan
buhat sa bibig ninyo.
9 Huwag magsinungaling sa isa’t isa, na
nakikitang hinubad na ninyo ang lumang tao kasama ng mga gawain niya;
10 At isinuot na ang bagong tao, na ito ay
napapanibago sa kaalaman alinsunod sa larawan niyang lumalang dito:
11 Kung saan ay walang Griyego ni Judeo,
pagtutuli ni di-pagtutuli, Barbaro, Eskito, alipin ni malaya: kundi si Kristo
ay lahat, at nasa lahat.
12 Isuot kung gayon, gaya ng mga hinirang ng
Diyos, mga banal at mga minamahal, ang mga kaloob-looban ng mga awa, kabaitan,
kapakumbabaan ng pag-iisip, kaamuan, pagbabata;
13 Na nagtitiisan sa isa’t isa, at nagpapatawaran
sa isa’t isa, kung ang sinumang tao ay may pakikipag-alitan laban sa kaninuman:
kung paanong pinatawad kayo ni Kristo, ay gayon din naman ang gawin ninyo.
14 At higit sa lahat ng bagay na ito ay isuot ang
pagsinta, na ito ay ang tali ng pagkasakdal.
15 At hayaan ang kapayapaan ng Diyos na mamuno sa
mga puso ninyo, na patungo doon din naman ay tinatawag kayong nasa iisang
katawan; at maging mapagpasalamat kayo.
16 Hayaang ang salita ni Kristo ay manahan sa
inyo nang mayaman sa buong karunungan; na nagtuturuan at nagpapaalalahanan sa
isa’t isa sa mga salmo at mga himno at mga awit na espirituwal, na umaawit na
may biyaya sa mga puso ninyo patungo sa Panginoon.
17 At anuman ang ginagawa ninyo sa salita o
gawain, ay gawing lahat sa pangalan ng Panginoong Jesus, na nagbibigay
pasalamat sa Diyos at Ama sa pamamagitan niya.
18 Mga asawa, ipasakop ang inyong sarili sa mga bana
ninyo, gaya ng ito ay dapat sa Panginoon.
19 Mga bana, mahalin ang mga asawa ninyo, at
huwag maging mapait laban sa kanila.
20 Mga anak, tumalima sa mga magulang ninyo sa
lahat ng bagay: pagkat ito ay lubos na nakalulugod sa Panginoon.
21 Mga ama, huwag udyukan sa pagkagalit ang mga
anak ninyo, baka panghinaan sila ng loob.
22 Mga lingkod, tumalima sa lahat ng bagay sa mga
amo ninyong mga ayon sa laman; hindi sa paglilingkod-sa-paningin, gaya ng mga
nagbibigay-lugod sa mga tao; kundi sa katapatan ng puso, na natatakot sa Diyos:
23 At anuman ang ginagawa ninyo, ay gawin ito
nang taos-puso, gaya ng sa Panginoon, at hindi sa mga tao;
24 Na nalalamang mula sa Panginoon ay tatanggapin
ninyo ang gantimpala ng pamana: pagkat naglilingkod kayo sa Panginoong Kristo.
25 Ngunit siya na gumagawa ng mali ay tatanggap dahil
sa maling ginawa na niya: at doon ay walang pagtatangi ng mga tao.
MGA AMO, ibigay sa mga lingkod ninyo kung ano ang
makatarungan at patas; na nalalamang kayo rin naman ay may isang Among nasa
langit.
2 Magpatuloy sa panalangin, at magbantay sa ganoon
din na may pagpapasalamat;
3 Bukod dito ay manalangin din patungkol sa amin,
upang pagbuksan kami ng Diyos ng isang pintuan ng pagbigkas, upang salitain ang
hiwaga ni Kristo, na dahil doon ay nakatanikala rin naman ako:
4 Nang mailantad ko ito, gaya ng nararapat kong
salitain.
5 Lumakad sa karunungan
tungo sa kanilang nasa labas, na sinasamantala ang panahon.
6 Hayaang ang pananalita ninyo
ay tuluy-tuloy na may biyaya, na tinimplahan ng asin, nang malaman ninyo kung
paano kayong nararapat na sumagot sa bawa’t tao.
7 Ang buong lagay ko ay isasaysay
sa inyo ni Tikikus, na siya ay isang minamahal na kapatid, at isang matapat na ministro
at kasamang-lingkod sa Panginoon:
8 Na siya ang isinugo ko sa
inyo sa gayon ding layunin, nang malaman niya ang kalagayan ninyo, at maaliw
ang mga puso ninyo;
9 Kasama si Onesimus, isang
matapat at minamahal na kapatid, na siya ay isa sa inyo. Ipapaalam nila sa inyo ang lahat ng bagay na
ginagawa rito.
10 Si Aristarkus na kasamang-bilanggo ko ay
nagpupugay sa inyo, at si Markus, na pinsan ni
Barnabas, (na patungkol sa kanya ay tumanggap kayo ng mga kautusan: kung
pumariyan siya sa inyo, ay tanggapin siya;)
11 At si Jesus, na tinatawag
na Justus, na sila ay mula sa pagtutuli. Ang mga ito lamang ang mga
kasamang-manggagawa ko patungo sa kaharian ng Diyos, na siyang naging isang kaaliwan
ukol sa akin.
12 Si Epafras, na siya ay isa sa inyo, na isang
lingkod ni Kristo, ay nagpupugay sa inyo, na palaging nagpapagal nang mataimtim
dahil sa inyo sa mga panalangin, nang makatayo kayong sakdal at lubos sa buong
kalooban ng Diyos.
13 Pagkat sinasaksihan ko siya, na mayroon siyang isang
malaking sigasig dahil sa inyo, at sa kanilang nasa Laodisea, at sa kanilang
nasa Hiyerapolis.
14 Si Luka, ang minamahal na
manggagamot, at si Demas, ay bumabati sa inyo.
15 Pugayan ang mga kapatid
na nasa Laodisea, at si Nimfas, at ang simbahang nasa bahay niya.
16 At kapag binasa ang sulat
na ito sa gitna ninyo, ay sikapin ninyong maipabasa rin naman ito sa simbahan
ng mga taga-Laodisea; at sa katulad na paraan ay basahin ninyo ang sulat mula
sa Laodisea.
17 At sabihin kay Arkipus,
Mag-ingat sa ministeryong tinanggap mo na sa Panginoon, na ganapin mo ito.
18 Ang pagpupugay sa
pamamagitan ng kamay kong si Paulo. Alalahanin
ang mga tanikala ko. Makasama nawa ninyo ang biyaya. Amen.
No comments:
Post a Comment