KABANATA 1
SI PAULO, na isang
apostol ni Jesus Kristo sa pamamagitan ng kalooban ng Diyos, ayon sa pangako ng
buhay na nakay Kristo Jesus,
2 Kay Timoteo, ang pinakamamahal kong anak: Biyaya,
awa, at kapayapaan, mula sa Diyos Ama at kay Kristo Jesus na Panginoon natin.
3 Pinapasalamatan ko ang Diyos, na
pinaglilingkuran ko mula pa sa mga ninuno ko nang may dalisay na budhi, na
walang tigil akong may pag-alala sa iyo sa mga panalangin ko gabi at araw;
4 Na lubhang naghahangad na makita ka, na nagiging
maalalahanin sa mga luha mo, upang mapuno ako ng kagalakan;
5 Kapag ginugunita ko sa pag-alala ang
pananampalatayang di-pakunwari na nasa iyo, na ito ay unang nanahan sa lola mong
si Lois, at sa nanay mong si Eunise; at ako ay naniniwalang nasa iyo rin naman.
6 Kaya nga ipinapaalala ko sa iyo na pukawin
mo ang kaloob ng Diyos, na ito ay nasa iyo sa pamamagitan ng paglalagay ng mga
kamay ko.
7 Pagkat hindi tayo binigyan ng Diyos ng
espiritu ng pagkatakot; kundi ng kapangyarihan, at ng pagmamahal, at ng isang wastong
pag-iisip.
8 Huwag mong ikahiya kung gayon ang patotoo ng
ating Panginoon, o ako man na bilanggo niya: kundi maging kabahagi ka ng mga
paghihirap ng mabuting-balita ayon sa kapangyarihan ng Diyos;
9 Na siyang nagligtas sa atin, at tumawag sa
atin ng isang banal na pagkakatawag, hindi ayon sa mga gawa natin, kundi ayon
sa sarili niyang layunin at biyaya, na ibinigay sa atin kay Kristo Jesus, bago
pa nagsimula ang sanlibutan;
10 Ngunit ngayon ay inilalantad sa pamamagitan
ng pagpapakita ng Tagapagligtas nating si Jesus Kristo, na winakasan na ang
kamatayan, at nagdala ng buhay at kawalang-kamatayan patungo sa liwanag sa
pamamagitan ng mabuting-balita:
11 Na patungo roon ay itinakda akong isang
mangangaral, at isang apostol, at isang guro ng mga Hentil.
12 Sa dahilang iyon ay nagtitiis din naman ako
ng mga bagay na ito: gayon pa man ay hindi ako nahihiya; pagkat kilala ko ang pinanaligan
ko, at naniniwala akong kaya niyang ingatan ang ipinagkatiwala ko sa kanya
hanggang sa araw na iyon.
13 Panghawakang mabuti ang anyo ng mga wastong
salita, na narinig mo sa akin, sa pananampalataya at pagmamahal na nakay Kristo
Jesus.
14 Ang mabuting bagay na iyon na
ipinagkatiwala sa iyo ay ingatan sa pamamagitan ng Banal na Diwang nananahan sa
atin.
15 Ito ay nalalaman mo, na silang lahat na nasa
Asya ay tumalikod sa akin; na sa kanila ay sina Figelus at Hermogenes.
16 Bigyan nawa ng Panginoon ng awa ang bahay
ni Onesiforus; pagkat madalas niya akong pinapaginhawa, at hindi ikinahihiya
ang tanikala ko.
17 Kundi, noong nasa Roma siya, ay hinanap
niya ako nang buong sikap, at natagpuan ako.
18
Ipagkaloob nawa sa kanya ng Panginoon na makatagpo siya ng awa mula sa Panginoon
sa araw na iyon: at kung gaano karaming bagay ang ipinagministeryo niya sa akin
sa Efesus, ay alam na alam mo.
IKAW kung gayon, anak ko, ay magpakalakas sa
biyaya na nakay Kristo Jesus.
2 At ang mga bagay na narinig mo na sa akin sa
gitna ng maraming saksi, ay siya mo rin namang ipagkatiwala sa matatapat na
tao, silang makakaya rin namang magturo sa mga iba.
3 Ikaw kung gayon ay magtiis ng kahirapan,
gaya ng isang mabuting kawal ni Jesus Kristo.
4 Walang taong nakikipagdigma ang isinasangkot
ang kanyang sarili sa mga bagay ng sanlibutang ito; upang mabigyang-lugod niya
siya na pumili sa kanya na maging isang kawal.
5 At kung ang isang tao rin naman ay
makipaglaban sa mga laro, gayunman ay hindi siya puputungan, malibang
makipaglaban siya ayon-sa-alituntunin.
6 Ang magsasaka na nagpapagal ay dapat maging
unang kabahagi ng mga bunga.
7 Isaalang-alang ang sinasabi ko; at bibigyan
ka ng Panginoon ng pagkaunawa sa lahat ng bagay.
8 Alalahaning si Jesus
Kristo na mula sa binhi ni David ay binuhay mula sa mga patay ayon sa
mabuting-balita ko:
9 Kung saan ay nagtitiis
ako ng hirap, gaya ng isang manggagawa ng kasamaan, maging hanggang sa mga
tanikala; ngunit ang salita ng Diyos ay hindi natatanikalaan:
10 Kung gayon ay
nagtitiis ako ng lahat ng bagay alang-alang sa mga hinirang, upang makamtan din
naman nila ang kaligtasan na ito ay nakay Kristo Jesus na may kaluwalhatiang
walang-hanggan.
11 Ito ay isang matapat
na kasabihan: Pagkat kung namatay tayong kasama niya, ay mabubuhay rin naman
tayong kasama niya:
12 Kung magtiis man tayo,
ay maghahari din naman tayong kasama niya: kung itanggi natin siya, ay
itatanggi rin naman niya tayo:
13 Kung hindi tayo nananalig,
gayunman ay mananatili siyang matapat: hindi niya maaaring tanggihan ang
kanyang sarili.
14 Tungkol sa mga bagay
na ito ay ipaalala sa kanila, na inaatasan sila sa harapan ng Panginoon na
huwag silang makipagtalo tungkol sa mga salitang walang pakinabang, kundi sa
ikapapahamak ng mga tagapakinig.
15 Mag-aral upang
maipakita ang sarili mo na subok sa Diyos, isang manggagawang hindi
kinakailangang mapahiya, na naghahati nang tama sa salita ng katotohanan.
16 Ngunit ilagan ang
lapastangan at walang-kabuluhang mga usapan: pagkat ang mga ito ay lalago patungo
sa higit pang di-pagkamakadiyos.
17 At ang salita nila ay kakalat gaya ng
ginagawa ng isang ganggrena; na sa kanila ay sina Himeneus at Filetus;
18 Na sila tungkol sa katotohanan ay naligaw,
na nagsasabing ang pagkabuhay na muli ay nakalipas na noon pa; at ibinabagsak
ang pananampalataya ng ilan.
19 Gayon pa man ang pinagsasaligan ng Diyos ay
nakatayong tiyak, na may ganitong tatak, Kilala ng Panginoon silang sa kanya. At, Hayaan ang bawa’t
isang sumasambitla sa pangalan ni Kristo ay umalis mula sa kawalang-katarungan.
20 Ngunit sa isang malaking bahay ay hindi
lamang may mga sisidlan ng ginto at ng pilak, kundi ng kahoy at ng lupa rin
naman; at ang ilan ay sa ikararangal, at ang ilan ay sa di-ikararangal.
21 Kung ang isang tao kung gayon ay maglinis
ng kanyang sarili mula sa mga ito, siya ay magiging isang sisidlang
ikararangal, pinabanal, at nararapat ukol sa paggamit ng may-ari, at nakahanda
sa bawa’t mabuting gawa.
22 Takasan din naman ang mga pitang
pangkabataan: ngunit sumunod sa katuwiran, pananampalataya, pagsinta,
kapayapaan, na kasama nilang tumatawag sa Panginoon buhat sa isang pusong
dalisay.
23 Ngunit ang hangal at di pinag-aralang mga
katanungan ay iwasan mo, na nalalamang
nagbubunga sila ng mga sigalutan.
24 At ang lingkod ng Panginoon ay hindi dapat
makipagtalo; kundi maging malumanay sa lahat ng tao, tumpak magturo, matiyaga,
25 Sa kaamuan ay inaaralan silang sumasalungat
sa kanilang sarili; kung sakali ay bibigyan sila ng Diyos ng pagsisisi patungo sa
pagkakilala ng katotohanan;
26 At nang mabawi nila ang kanilang sarili
buhat sa bitag ng diyablo, na sila ay binihag niya sa kalooban niya.
No comments:
Post a Comment